Arizona shtatidagi Feniks shahri maktablaridan birining hovlisida ochiqdan-ochiq otishma bo‘ldi. Bu haqda Associated Press xabariga asoslanib "Novaya gazeta” sayti xabar tarqatgan.

Shahar politsiyasi vakili Stiv Martosning aytishicha, Sesar Chavez nomli maktab hovlisida 15 marta o‘q uzilgan. Bu paytda maktabda basketbol bo‘yicha musobaqa bo‘layotgan, unda ikki yuzdan ortiq odam ishtirok etayotgan bo‘lgan.

Voqeada hech kim jabr ko‘rmagan. Politsiya hozirda otishmani sodir etgan uch nafar noma’lum kimsani qidirmoqda. Ikki nafar gumondor allaqachon so‘roq qilish uchun qo‘lga olingan, biroq ularning aybi isbotlanganicha yo‘q. Voqeaning boshqa tafsilotlari aniqlashtirilmoqda.