AQSh armiyasi mahalliy jangari guruhlardan birining dala qo‘mondonini yo‘q qilish maqsadida 27-yanvar kuni tunda Somali hududiga raketa hujumlarini uyushtirdi. Gumon qilinishicha, mazkur guruh "Al-Qoida” xalqaro terrorchilik tarmog‘i hamda Somalidagi "Ash-Shabob” guruhi bilan aloqador. Bu haqda "Reyter” agentligi xabariga tayanib "RIA Novosti” xabar bermoqda.

Ma’lumotlarga ko‘ra, harbiy operatsiya Somalining janubiy tumanlarida olib borilgan. Uning tafsilotlari va natijalari haqida hozircha xabar berilmagan.

Somali respublikasi 1991-yilda Siad Barre rahbarligidagi diktatorlik tuzumi ag‘darilishi bilan yaxlit davlat sifatidagi maqomini yo‘qotgan. Xalqaro hamjamiyat bu mamlakatdagi yagona qonuniy hukumat sifatida poytaxt Mogadisho va uning atrofidagi bir qancha tumanlarnigina nazorat etayotgan federal hokimiyatni tan oladi. Somalining qolgan hududlari esa tan olinmagan nodavlat tashkilotlari nazorati ostida yoki o‘z-o‘zini boshqaruvchi hududlar hisoblanadi. Mamlakatning janubi va shimoli-sharqidagi ayrim tumanlarda mahalliy to‘dalar va radikal islomchi harakatlar hukmronlik qiladi. Ular qatorida "Al-Qoida” bilan aloqador "Ash-Shabob” guruhlari ham bor.