Toshkentda o‘tkazilgan VII Innovatsion g‘oyalar, texnologiyalar va loyihalar respublika yarmarkasida poytaxtimizdagi Solar Energy Products kompaniyasi mobil telefonlar uchun quyoshdan zaryad oluvchi qurilmani taqdim etdi. Bu haqda ICTNews xabar berdi.

"Yetti voltli quvvatga ega telefonlar uchun qurilma hozirda faqat Nokia rusumli telefonlarni zaryad qilishga mo‘ljallangan. Shu bilan birga biz USB orqali har qanday modeldagi telefonlarga quvvat beradigan funksiyani tadbiq etishni rejalashtirmoqdamiz. Quyoshdan zaryad oluvchi qurilmaning quvvati qariyb 3 Vattni tashkil etadi”, — deydi kompaniya texnigi Rene Fatkullayev.

Telefon quvvat olishi uchun uni qurilmaga ulab, quyosh nuri to‘g‘ridan-to‘g‘ri tushadigan joyga qo‘yish kerak. Qurilmaning taxminiy narxi 50 000 so‘mdan iborat. Uni hozirda faqat kompaniya ofisidan xarid qilish mumkin.

Solar Energy Products kompaniyasi qurilmani ishlab chiqarish loyihasi ustida deyarli bir yildan beri shug‘ullanmoqda. Keyinchalik ushbu qurilmani eksport qilish ham rejalashtirilmoqda.