Shu yil 27 yanvar kuni O‘zbekistonning Xitoydagi elchisi Baxtiyor Saidov Xitoy tashqi ishlar vazirligi Yevropa va Markaziy Osiyo departamenti direktori Sun Linszyan bilan suhbat o‘tkazgan.

Suhbatda chet el fuqarolarining Uxan shahridan (Xubey provinsiyasi) evakuatsiya qilish bilan bog‘liq masalalar muhokama qilindi. Xitoylik diplomat mamlakat xukumatining koronavirus tarqalishini chegaralash hamda infeksiyani profilaktika qilish va davolash borasida ko‘rayotgan har tomonlama choralari to‘g‘risida ma’lumot berib o‘tgan.

Xitoy tomoni hozirda chet el fuqarolarini Uxan shahridan evakuatsiya qilish masalasini ko‘rib chiqmayotganini yana bir bor tasdiqladi va epidemiyaning ehtimoliy tarqalishiga yo‘l qo‘ymaslik maqsadida karantin rejimining butun davri yakunlanmaguncha O‘zbekiston fuqarolarini olib chiqib ketmaslikni so‘radi.

Eslatib o‘tamiz, 30 yanvar holati bo‘yicha 170 kishi koronavirusidan vafot etgan. Hatto Xitoy janubi-g‘arbidagi Tibet muxtor tumanida yangi turdagi pnevmoniya bilan kasallangan birinchi odam qayd etildi. Tibet — 2019-nCoV virusidan xoli Xitoydagi yagona hudud edi.