Samsung kompaniyasi mobil qurilmalar, televizorlar va maishiy texnika jihozlarini birlashtiruvchi Smart Home platformasini taqdim etdi. Bu haqda Samsung blogida xabar berilgan.

Smart Home platformasining tarkibiy qismlaridan biri smartfonlar uchun ishlangan maxsus dasturdir. Foydalanuvchi uning yordami bilan uydagi boshqa elektr jihozlarini boshqarishi, masalan, konditsionirni o‘chirib-yoqishi, chiroqlarni pasaytirishi mumkin bo‘ladi. Agar maishiy texnika jihozi kamera bilan ta’minlangan bo‘lsa (masalan, Samsung televizorlarida kamera mavjud), ulardan olingan tasvirlarni bu dastur smartfon ekraniga uzatib turadi.

Bulardan tashqari, dastur har bir jihozning holatini ham nazorat qilib boradi. Deylik, biror jihozda rejadagi tekshiruv vaqti kelganligini, boshqasining batareykasini almashtirish lozimligini eslatib turadi.

Smart Home doirasidagi jihozlar Samsung tomonidan ishlab chiqilgan SHP protokoli orqali o‘zaro ma’lumot almashadi. Mazkur protokol haqida hozircha batafsil ma’lumot berilmayapti.

Smart Home platformasi 7-yanvarda Las-Vegasda ochiladigan Consumer Electronics Show (CES) ko‘rgazmasida namoyish etiladi. Foydalanuvchilar uni joriy yilning birinchi yarmidayoq ishlatib ko‘rishlari mumkin bo‘ladi.

Ma’lum bo‘lishicha, CES ko‘rgazmasida Smart Home’ga o‘xshash mahsulotni Samsung’ning asosiy raqiblaridan biri – LG kompaniyasi ham namoyish etadi. Uning HomeChat tizimi maishiy texnika jihozlarini telefondan yuboriladigan matnli xabarlar orqali boshqarish imkonini beradi.

Manba:daryo.uz