Rossiyaning Rostov oblasti aloqa va axborot texnologiyalari vaziri German Lopatkin chet el internet-servislari, xususan Google’dan foydalanmaslikni tavsiya qilmoqda. Bu haqda TJournal nashri xabar berdi.

Vazirning fikricha, Rossiya hukumati yuborilayotgan ma’lumotlarning himoyalanganligini nazorat qila olmasligi tufayli, xorijiy internet-xizmatlarni xavfsiz deb bo‘lmaydi. Bu Google’ning qidiruv tizimi emas, pochta va fayl almashuv xizmatlaridan foydalanganda, ayniqsa, keng kuzatilishini ta’kidladi.

Lopatkin xorijiy internet-kompaniyalar servislari o‘rniga Rossiya mahsulotlarini yoki korporativ tarmoqlarni ishlatishni tavsiya qildi. U Donland.ru Rostov hukumat portalini xavfsiz servislardan biri sifatida namuna qilib keltirgan.

Biroq bunga javoban, TJournal portalda jamoatchilik pochta xizmati yo‘lga qo‘yilmagani, shuningdek, portal bosh sahifasida Rostov oblasti hukumatining ijtimoiy tarmoqlardagi sahifalariga, jumladan Google’ga tegishli YouTube videoservisiga linklar berilganini qayd etdi.

 Manba:daryo.uz