O‘yinning birinchi bo‘limi 9-daqiqasida yaponiyalik futzalchilar hisobda oldinga chiqib oldi, ammo oradan bir daqiqa o‘tmasdan Andrey Shlema o‘rtadagi muvozanatni tikladi – 1:1.

O‘yinning ikkinchi bo‘limi teng kurashlar ostida kechdi, ammo o‘yinning asosiy vaqti so‘nggi daqiqasida Artur Yunusov O‘zbekiston terma jamoasiga g‘alaba keltirgan gol muallifiga aylandi.

Shu tariqa, 2-tur uchrashuvida Yaponiyani mag‘lubiyatga uchratgan Bahodir Ahmedov shogirdlari guruhdagi ochkolari sonini to‘rttaga yetkazdi. Guruhning ikkinchi o‘yinida Qirg‘iziston terma jamoasi Janubiy Koreyani 4:1 hisobida mag‘lubiyatga uchratdi.

Ma’lumot o‘rnida: O‘zbekiston terma jamoasi guruhning so‘nggi o‘yinida Janubiy Koreya terma jamoasiga qarshi bahs olib boradi. Ushbu o‘yin 5-may kuni soat 16:30 da boshlanadi.

Eslatib o‘tamiz, 1-may kuni bo‘lib o‘tgan birinchi tur o‘yinida Bahodir Ahmedov bosh murabbiyligidagi o‘zbekistonlik futzalchilar Qirg‘iziston terma jamoasi bilan 2:2 hisobida durang o‘ynagan edi.