O‘zbekistonda jamoat joylarida chekkanlik uchun jarimalar kiritildi
O‘zbekistonda birinchi marta jamoat joylarida chekkanlik uchun jarimalar joriy qilindi, deb yozadi “Gazeta.uz”. Ma’muriy javobgarlik kodeksiga tuzatishlar kiritish haqidagi qaror 29-dekabr kuni Prezident Islom Karimov tomonidan imzolandi. Ular 30-dekabr kuni kuchga kirdi.
Ma’muriy javobgarlik kodeksining yangi 56-1-moddasiga ko‘ra, ish joylari, sog‘liqni saqlash, ta’lim va sport-sog‘lomlashtirish muassasalari, yong‘in xavfi bo‘lgan joylar, jumladan, avtomobilga yoqilg‘i quyish shoxobchalari va boshqa jamoatchilik joylarida tamaki mahsulotlarini iste’mol qilish eng kam oylik ish haqining 1/3 qismi hajmidagi jarima bilan jazolanadi.
Bunday joylarda tamaki mahsulotini iste’mol qilishga maxsus ajratilgan maydonlar va bu uchun mo‘ljallangan xonalarda ruxsat beriladi.
Nashr eslatishicha, tamaki mahsuloti deganda, qonunchilikka ko‘ra, tamaki yoki uning o‘rnini bosuvchi modda (jumladan nosvoy)dan tayyorlangan har qanday mahsulot tushuniladi.
Tamaki mahsulotlarini mahalliy va uzoqqa qatnaydigan poyezdlar, kemalar, shahar atrofiga qatnaydigan poyezdlar, shahar ichida va shahar atrofiga qatnaydigan, shaharlararo va xalqaro qatnovdagi avtobuslarda, shuningdek, taksi, yo‘nalishli taksi va shahar elektr transportida iste’mol qilganlik uchun jarima eng kam oylik ish haqining 1/20 qismidan 1/3 qismigacha oshirildi. Tamaki mahsulotlarini havo kemalarida iste’mol qilish avvalgidek eng kam oylik ish haqining 2 barobaridagi jarima bilan jazolanadi.
Ishq Jodusi-soundtreck
O‘zbekistonda jamoat joylarida chekkanlik uchun jarimalar kiritildi 
