Mart oyidan boshlab televideniyeda "Kuch birlikda” deb nomlangan bolalar uchun sarguzasht serial ekranga chiqadi. Bugungi kunga kelib filmni suratga olish ishlari yakunlandi. Hozir montaj va ovoz berish jarayonlari davom etmoqda. Dastlabki ma’lumotlarga qaraganda, serial o‘zbek va rus tillarida efirga uzatiladi. Bu haqda "Podrobno” nashri xabar berdi.

2013-yilning sentabr oyida  YUNISEFning moddiy yordami va O‘zbekiston Sog‘liqni saqlash vazirligi tashabbusi bilan "Kinoprom” kompaniyasi bolalar uchun birinchi mahalliy sarguzasht serialni suratga olish ishlarini boshladi. 

Rejissor Andrey Afrinning so‘zlariga ko‘ra, serial syomkalarida 168 nafar aktyor ishtirok etdi. Unda qatnashgan bolalar professional aktyorlar emas, ular kasting yordamida tanlangan. Kimdir teatrda ozgina tajribaga ega, yana kimdir reklamaga tushgan. Ammo ularning hammasi oddiy bolalar, serialda o‘zlarini aks ettirgan.

Syujet bo‘yicha mamlakatimizning turli joylaridan kelgan yettita bola ta’til vaqtida sirli xat olishadi. Maktubda ularga muhim vazifa berilgan bo‘ladi. Bunda ularning yetakchisi imkoniyati cheklangan jajji qizaloq Lola bo‘ladi. Bolalar va qizlar "maxfiy xizmat”ning a’zolari etib tayinlanadi. Ularning oldida dunyoni qutqarish yoki katta shaharda yo‘qolgan bolani topish vazifasi qo‘yiladi. Maxfiy vazifalar qayerdan uzatilishi hech kimga ayon bo‘lmagan Ma’lumotlar markazidan kelib tushadi. Ushbu Markazga yosh qahramonlar "teleportatsion braslet” orqali o‘tishadi. Serialning har qismida O‘zbekistonning turli joylaridagi yangi sarguzashtlar namoyish etiladi.

Tez kunlarda serialning 15 qismdan iborat birinchi fasli ekranga chiqadi. Fantastik serial mualiflari ikkinchi faslni suratga olishni rejalashtirgan. Rejissorning ma’lum qilishicha, ikkinchi mavsum juda kichik bolalar uchun mo‘ljallangan. Buni hisobga olgan holda ba’zi qahramonlar o‘zgarishi mumkin.