Islom Karimov harbiy xizmatchilarni tashqi tahdidlarga tayyor turishga chaqirdi
O‘zbekiston prezidenti, mamlakat Qurolli Kuchlari bosh qo‘mondoni Islom Karimov 14 yanvar kuni O‘zbekiston Respublikasi Qurolli Kuchlari tashkil etilganiga 24 yil to‘lishi munosabati bilan Vatan himoyachilariga yo‘llagan bayram tabrigida harbiy xizmatchilarni mintaqadagi vaziyatni hisobga olgan holda ehtimoliy harbiy to‘qnashuvlarga tayyor turishga chaqirgan.
"Vujudga kelayotgan harbiy-siyosiy vaziyatni, zamonaviy harbiy san’at sohasidagi yutuqlar va harbiy qurilish borasida to‘plagan tajribamizni, shuningdek, yuz berishi mumkin bo‘lgan harbiy harakatlar teatrining o‘ziga xos xususiyatlarini inobatga olgan holda, milliy armiyamizning tashkiliy tuzilishi va jangovar tarkibini, qo‘shinlarni boshqarish tizimini yanada takomillashtirish lozim.
O‘zbekistonga qo‘shni mintaqalarda vaziyat doimiy ravishda o‘zgarib, tahdidlar kuchayib borayotgan, mamlakatimiz hududiga turli bosqinchi to‘dalar va qo‘poruvchi guruhlarning suqilib kirish ehtimoli istisno etilmayotgan bir sharoitda harbiy tuzilmalarni, birinchi navbatda, xavf-xatar yuqori bo‘lgan operasion yo‘nalishlarda yanada mustahkamlash va safarbar etishga ustuvor ahamiyat berish zarur", deydi prezident.
Islom Karimov harbiy xizmatchilarni tashqi tahdidlarga tayyor turishga chaqirdi 
