WhatsApp’ning asosiy raqobatchisiga aylanishi kutilayotgan Telegram’ning Windows Phone operatsion tizimi uchun dasturi 2014-yil yanvarida taqdim etilishi e’lon qilindi, deb yozmoqda Winbeta sayti.

 Hozirgi kunda Telegram’ning Android va iOS platformalari uchun versiyalari mavjud.

 Android operatsion tizimida ishlaydigan qurilmalar uchun dasturlar do‘koni — Google Play’da ayni paytda o‘zbekistonliklar orasida eng ommabop bo‘lgan dastur Telegram ekanligi, yurtdoshlarimizning bir paytlar sevimli bo‘lgan WhatsApp’i esa Telegram’dan keyingi ikkinchi o‘ringa tushib qolgani haqida avval xabar bergan edik.

Eslatib o‘tamiz, WhatsApp so‘nggi kunlarda texnik muammolarga duch kelgani sababli o‘zbekistonlik WhatsApp foydalanuvchilari ommaviy tarzda Telegram dasturiga o‘tishni boshlagan, texnik nosozliklar haqida WhatsApp rasmiy tvitteri ham xabar bergan edi.

Telegram dasturi WhatsApp’ga juda o‘xshash bo‘lsa-da, ishlash tezligi, butunlay bepulligi va yuborilayotgan xabarlar shifrlanishi uning ustun tomonlaridan biri, deb ko‘rsatilgan dastur rasmiy saytida. Hozirgi paytda Telegram iOS, Android, Windows va Mac OS X operatsion tizimlarida ishlaydi. Dasturning Java versiyasi ustida ish olib borilayotgani haqida dasturchi Denish Olshin o‘zining "Vkontakte”dagi sahifasida xabar beradi.