—O‘g‘lim bilan kelinim ikki yil birga yashab, gapi-gapiga to‘g‘ri kelmadi chog‘i hozirda birga yashashmaydi. O‘rtalarida bir farzand bor. O‘g‘lim ayni dam xorijda. O‘zim ko‘zi ojiz ayolman. Kelinim «shifoxonada davolandim, qaramadinglar» deb, po‘pisa qilavergach, topganimni yig‘ib-terib olib bordim. Ammo «bu kam, mana ko‘rasizlar, bir yillik moddiy zararni undirib olaman» deb battar to‘palon ko‘tardi. O‘g‘lim bu yerda bo‘lmasa, kelinimning shunday qilishga haqqi bormi?

Gulchehra Solihova, Buxoro viloyati

Advokat Dilfuza To‘xtayeva javob beradi: — Amaldagi qonunlarga ko‘ra, keliningiz unga yetkazilgan moddiy va ma’naviy zararni undirish masalasida da’vo qo‘zg‘atishga haqli. Lekin shunday qilgan taqdirida, o‘ziga yetkazilgan moddiy va ma’naviy zararni isbotlashi kerak bo‘ladi. Qonuniy umr yo‘ldoshi, farzandining otasi hayot ekan, sizdan moddiy yordam talab qilishga haqli emas.

Manba: “SUG‘DIYONA” gazetasi