Jinoyat ishlari bo‘yicha Urganch shahar sudi qarori bilan Zuhra Azimova besh yil muddatga ozodlikdan mahrum etildi, deya xabar berdi "12uz” nashri.

Unga O‘zbekiston Respublikasi Jinoyat kodeksining 130- ("Pornografik mahsulotni tayyorlash, olib kirish, tarqatish, reklama qilish, namoyish etish”), 131- ("Fohishaxona saqlash yoki qo‘shmachilik qilish”) va 135-moddalari ("Odam savdosi”) bo‘yicha ayblovlar qo‘yildi.

Ma’lum bo‘lishicha, u Urganchning ko‘p qavatli uylaridan birida fohishaxona ochib, qizlarni aldov yo‘li bilan bu ishga jalb etgan. U yerda qizlarni majburlash yo‘li bilan saqlab, pornografik filmlarni ko‘rsatgan.

Shunisi ajablanarliki, bundan avval Zuhra Azimovaga nisbatan ikki marta jinoiy ish qo‘zg‘atilgan, ularning har ikkalasida ham u vaziyatdan osonlik bilan qutulib ketgan. JKning 131-moddasi ("Fohishaxona saqlash yoki qo‘shmachilik qilish”) bo‘yicha tayinlangan jazo amnistiya tufayli bekor qilingan bo‘lsa, 266-moddaning 1-qismi ("Transport vositalari harakati yoki ulardan foydalanish xavfsizligi qoidalarini buzish”) va 117-moddaning 1-qismiga ("Xavf ostida qoldirish”) ko‘ra ayblanganida tomonlar kelishuvi natijasida jinoiy ish to‘xtatilgan edi.