Bo‘yin va yelkalardagi og‘riq, tunnel sindromi, muntazam charchash – bularning barchasi ofisda o‘tirib ishlash ortidan kelib chiqadigan noxush asoratlar sanaladi. Bu kabi muammolar kelib chiqmasligi uchun to‘g‘ridan-to‘g‘ri ish joyining o‘zida turli mashqlarni bajarish mumkin. Bu borada malakali murabbiylar sizga o‘z tavsiyalarini berib o‘tishadi. Bu mashg‘ulotga kiritilgan har bir mashqni sakkiz-to‘qqiz martadan bajaring. Mashg‘ulotlar oralig‘i 45-60 daqiqani tashkil etishi kerak. Bo‘yin mushaklarini qizdirish. Boshingizni oldinga, orqaga, ikki yonga eging. Keyin boshingizni bo‘yningiz bo‘ylab avval bir tomonga, keyin ikkinchi tomonga aylantiring. Yelkalarning doirasimon aylanishi. Yelkangizni qulog‘ingizga qadar yetkazing. Va qo‘llaringizni tegirmon kabi oldinga va orqaga burang. Yon tomonga egilish. Agar siz ikkala qo‘lingizni yuqoriga ko‘tarsangiz, mashqning murakkab turiga o‘tgan bo‘lasiz. Tizzalarni mashq qildirish. Ikkala oyog‘ingizni jips qilib turing, qo‘llaringizni tizza ustiga qo‘yib, oyoqlaringizni aylantiring. Stulda o‘tirib-turish mashqini bajaring.
Dastlab oyoq uchida, so‘ng tovonda turing. Bajarish mobaynida tizzangizni bukmang. Bu mashqni, yaxshisi past poshnali oyoq kiyim bilan yoki yalangoyoq bajargan ma’qul. Mashg‘ulot uchun eslatmalar: – Tanangizning barcha qismlari: bo‘yin, yelka, tirsak, kaft, barmoqlar, umurtqa suyagini oldinga-orqaga bukib mashq qiling. – Avval minimal amplitudada harakatlaning, so‘ngra harakatlar oralig‘ini oshiring. Bu, jarohatdan qochishga yordam beradi. – Iloji boricha xilma-xil harakatlar qiling. Aylana harakatlar va tortilish mashqlari mashg‘ulotning asosini tashkil etishi kerak. – Unutmang, razminka va muntazam mashg‘ulotlar kundalik jismoniy harakatning bir qismi, xolos.
Ofisda salomatlikni asrash borasida tavsiyalar 
