Lola Karimova yodgorlik ishlash uchun Angliya qirolichasining sevimli haykaltaroshini yolladi
Hozirda ijodiy guruhimiz bilan Moskvadamiz. O‘tgan yilning noyabr oyida Islom Karimov nomi berilgan Moskva markazidagi xiyobon va haykalning loyihasini Moskva shahar boshqaruv organlariga taqdim etish uchun tashrif buyurdik. Bu loyiha ustida ish olib borish biz uchun juda katta sharaf va mas’uliyatdir. Mazkur xiyobon shaharning chiroyli joylaridan biri bo‘lib qolishini istaymiz. Shu sababli ushbu loyiha ustida ish olib borishga Londonning chinakkam bezagi bo‘lmish "Britaniya uchun jang" monumental inshooti, Qirolicha-ona haykali hamda Londonning Sent-Pankras stansiyasidagi "Uchrashuv joyi" bronza haykalini yaratgan mashhur angliyalik haykaltarosh Pol Deyni taklif etdik. Uning so‘nggi san’at asari "Iroq va Afg‘onistondagi urushlar" memorial yodgorligi 2017 yilning mart oyida Buyuk Britaniya Qirolichasi Yelizaveta II tomonidan tantanali ochilgan.
Moskva shahridagi loyiha ustida ishlar ekanmiz, ushbu xiyobon ko‘p yillardan keyin ham moskvaliklar va turistlar uchun o‘z jozibasini saqlab qolishiga alohida urg‘u berdik.
Biz vaqtincha loyihamiz tavsilotlari haqida batafsil ma’lumot bermayapmiz, sababi, 2018 yilda loyihamiz amalga oshganidan keyingina, uni keng omma e’tiboriga havola etmoqchimiz.
Mazkur loyihada ishtirok etayotgan barcha insonlarga o‘z minnatdorchiligimni izhor etaman.
Lola Karimova-Tillayevaning sahifasidan olindi
Lola Karimova yodgorlik ishlash uchun Angliya qirolichasining sevimli haykaltaroshini yolladi 
