Rejinaldo Silvaga Facebook’da topgan xatolik uchun to‘langan pul kompaniya tarixidagi eng katta mukofot bo‘ldi. Bu haqda The Next Web ma’lumotiga tayanib, TJournal xabar berdi. Facebook braziliyalik dasturchiga 33 500 AQSh dollari to‘ladi.

Fosh bo‘lgan xato Facebook’ka muammo olib kelishi mumkin edi. XML-kodda yovuz niyatli odamlar ijtimoiy tarmoqda saqlanayotgan deyarli istalgan faylga kirish imkoniga ega bo‘lar edi.

Kompaniya vakillari Silvadan xatolik haqidagi hisobotni noyabr oyida olgan va uni darhol hal qilgan. Facebook muammoni butunlay bartaraf etgandan so‘ng saytda xato bo‘lgani haqida ochiq ma’lumot berdi.

Bundan avvalgi rekord miqdordagi rag‘batlantiruvchi 20 000 AQSh dollariga teng mukofotni iyunda tarmoqdagi xatoni topgani uchun britaniyalik dasturchi olgan edi. Bu xato yordamida yovuz niyatli kishilar boshqalarning akkauntlarini qo‘lga kiritishi mumkin edi.

Xakerlarga Facebook’da topilgan muammolar to‘g‘risidagi xabar uchun to‘lov dasturi 2011-yil 8-noyabrda ishga tushirilgan. 2013-yil 8-noyabrda kompaniya Microsoft bilan hamkorlikda shunga o‘xshash yana bir loyihani ishlab chiqdi. Bunda arizalar bilan Facebook, Microsoft va Google ko‘ngillilari shug‘ullanadi.

2013-yil 21-avgustda Facebook falastinlik xakerga mukofot puli to‘lashni rad etgan edi. Kompaniya to‘lovdan bosh tortganini xaker o‘zining taxminini real foydalanuvchilarda sinab ko‘rgani bilan izohlagan edi. Vaziyat xakerlar hamjamiyatining e’tiborini jalb etdi va ular yosh yigitga 10 000 AQSh dollari yig‘ib berishdi.