Qozog‘iston qutqaruv xizmati vakili Ruslan Imankulov dastlabki brifingda yong‘in sabablari haqida gapirdi.

Uning so‘zlariga ko‘ra, yong‘in sabablari borasida hozircha aniq xulosa aytish qiyin, bu ekspertlar ko‘rigidan keyin ma’lum bo‘ladi.

Aqto‘be viloyati Favqulodda vaziyatlar departamentining dastlabki xulosasiga ko‘ra, avtobus yonib ketishiga uning texnik nosozligi sabab bo‘lgan. Aniqrog‘i elektr simlaridagi qisqa tutashuv sabab bo‘lgan. Undan tashqari avtobusga me’yoridan ortiq odam mingani va yuk ortilgan bo‘lgan.

Eslatib o‘tamiz, Aqto‘be viloyatining Irgiz tumanida bugun ertalab soat 10:30 da 57 kishi mingan yo‘lovchi avtobus yonib ketdi. Yo‘lovchilardan 52 kishi qurbon bo‘ldi. Qozog‘iston FVV xabariga ko‘ra, ularning barchasi O‘zbekiston fuqarolari.