Tijorat banklarida jismoniy shaxslar bilan valyuta ayirboshlash operatsiyalarini amalga oshirish tartibi to‘g‘risidagi nizomga o‘zgartirish va qo‘shimchalar kiritildi. Bu haqda Adliya vazirligining telegram kanali ma’lum qildi.

Kiritilgan o‘zgartirishlarga muvofiq, endilikda valyuta ayirboshlash shoxobchalari tomonidan rezident jismoniy shaxslarga ekvivalenti 100 АQSh dollari va ungacha bo‘lgan miqdordagi naqd chet el valyutasini sotishda ulardan pasport talab etilmaydi.

Hozirga qadar miqdoridan qatʼi nazar naqd chet el valyutasini sotishda pasport talab qilingan.

Maʼlumot uchun, rezident bu – O‘zbekistonda davlat ro‘yxatidan o‘tgan yuridik shaxs hamda O‘zbekistonda doimiy yashab turgan yoki joriy soliq davrida yakunlanayotgan har qanday ketma-ketlikdagi 12 oylik davr ichida jami 183 kun va undan ortiq muddat O‘zbekistonda yashagan jismoniy shaxs.