WhatsApp va Snapchat Rossiyada yirik jarimaga tortildi

Moskvaning Taganskiy tumani sudi WhatsApp LLC’ni rossiyaliklarning ma’lumotlarini mahalliylashtirishni qayta rad etgani uchun 18 million rubl, Snap Inc’ni 1 million rubl miqdorida jarimaga tortdi.

Moskvaning Taganskiy tumani sudi Meta korporatsiyasiga tegishli WhatsApp LLC’ni WhatsApp messenjerining rossiyalik foydalanuvchilari ma’lumotlarini mahalliylashtirishni qayta rad etgani uchun 18 million rubl miqdorida jarimaga tortdi. 28 iyul, payshanba kuni Amerika kompaniyasi RF MJTKning 13.11-moddasi 9-qismi bo‘yicha aybdor deb topildi. Sud kartotekasida qayd etilishicha, qaror sudya Timur Vaxrameyev tomonidan qabul qilingan. 

Shu kuni Moskvaning Taganskiy tumani sudi Amerikaning Snap Inc kompaniyasini o‘ziga tegishli Snapchat messenjerining rossiyalik foydalanuvchilari ma’lumotlarini mahalliylashtirishdan bosh tortgani uchun 1 million rubl miqdorida jarimaga tortdi. «Snap Inc. RF MHTKning 13.11-moddasi 8-qismi (operator tomonidan RF fuqarolari shaxsiy ma’lumotlarini RF hududida joylashgan ma’lumotlar bazalaridan foydalangan holda to‘plashda shaxsiy ma’lumotlarni hisobga olish, tizimlashtirish, saqlashni ta’minlash majburiyatini bajarmaslik) bo‘yicha aybdor deb topilsin», - deya qarorni e’lon qilgan sudyaning so‘zlaridan iqtibos keltiradi «Interfaks».

WhatsApp Inc. kompaniyasi 2014 yil oktyabridan beri Meta korporatsiyasi (avvalgi - Facebook) tarkibiga kiradi. 2022 yil mart oyida Tverskoy sudi RF Bosh prokuraturasining talabiga binoan Meta Platforms Inc. faoliyatini Rossiyada taqiqladi. 2021 yil avgustida WhatsApp rossiyalik foydalanuvchilar ma’lumotlarini mahalliylashtirishdan bosh tortgani uchun 4 million rubl miqdorida jarimaga tortilgan edi. 

Snapchat - mobil qurilmalar ekranida bir necha soniyaga paydo bo‘ladigan va keyin yana yo‘qolib qoladigan, lekin Snapchat serverida qoladigan fotosuratlar, video hamda xabarlar almashish imkonini beruvchi messenjer. Servis, ayniqsa, Yevropa va Shimoliy Amerika yoshlari orasida mashhur. Messenjerning kunlik foydalanuvchilari soni 300 million kishidan oshadi.