2017 yilning 22 noyabr kuni Shayxontohur tumanida diniy aqidaparastlik oqimning ta’siriga tushgan ayol — U. Uzoqova qo‘lga olindi. Hozirda unga nisbatan jinoyat ishi qo‘zg‘atilib, tergov harakatlari olib borilmoqda. Bu haqda O‘zA xabar bermoqda.

Xabarda O‘zA jurnalisti Norgul Abduraimova ayolni ona, millat tarbiyachisi, deya aytaydi. Haqiqatan shunday...

Onalar bor ekan, xonadonlar obod, farzandlar xushnud. Lekin ayol zimmasidagi mas’uliyatni unutsa, duch kelgan oqimda suzsa, adashsa, buning oqibati nima bo‘ladi?

O‘ttiz yoshni qarshilayotgan ayol baxtli hayot kechirsa, farzandlarining kelajagi haqida qayg‘ursa bo‘lardi. Lekin u ko‘p vaqtini "virtual olam"da o‘tkazardi. Shunday kunlarning birida internet orqali bir odam bilan tanishib qoladi. Uning din haqidagi chiroyli gaplariga mahliyo bo‘lib asta-sekin uning olamiga chuqur kirib borayotganini o‘zi sezmay ham qoladi.

U zimdan olayotgan ta’lim "Hizbut-tahrir" diniy ekstremistik oqimi g‘oyalarini targ‘ib qiluvchi "Islom nizomi" edi. Oradan ancha vaqt o‘tib ayolga "endi oqimimizga a’zolik haqida qasam ichishing va maslakdoshlarimizni ko‘paytirish uchun harakat qilishing kerak" mazmunida buyruq keladi. Ongi zaharlangan, oqimning ta’siriga butkul tushgan ayol buni so‘zsiz bajaradi.

O‘ylanib qolasan, islom dini rivojlangan, e’tiqod erkinligi ta’minlangan, diniy ta’limot olish uchun qonuniy manbalar bisyor yurtimizda nega ayrim odamlar shunday yo‘l tutmoqda?

Maqolada yozilishicha, yuqorida ism-sharifi tilga olingan ayol ichgan qasamini bajarish uchun diniy aqidaparastlik g‘oyalar bilan yo‘g‘rilgan “Musulmonlarning islom tuzumini tatbiq qilish oldidagi mas’uliyatlari” deb boshlanuvchi 14 dona varaqa solingan konvertni olib yo‘lga tushadi. Keyin esa...

Yaxshiyamki u maqsadini asl din qaror topgan masjidda amalga oshirmoqchi bo‘ldi. Gulbozor mahallasida joylashgan jome’ masjidga namozga yig‘ilganlar ayol ko‘tarib kelgan konvertni darrov imomga yetkazishdi.

Konvertni ochgan imom hammasini tushundi. Bu haqda tegishli organlarga xabar berdi. Ichki ishlar organlari va milliy xavfsizlik xizmati xodimlari tomonidan olib borilgan tezkor tadbir davomida ushbu qilmishni sodir etgan shaxs "Markaz-26" dahasidagi ko‘p qavatli uylardan birida doimiy ro‘yxatda turgan U. Uzoqova bo‘lib chiqdi. 2017 yil 22 noyabr kuni u qo‘lga olindi. Mazkur holat yuzasidan jinoyat ishi qo‘zg‘atilib, hozir tergov harakatlari olib borilmoqda.

Xabarda aytilishicha, jurnalist qo‘lga olingan U. Uzoqova yashagan Shayxontohur tumanidagi Gulobod mahallasi faollari bilan uning nima uchun to‘g‘ri yo‘ldan adashgani, nega bu jinoyat sodir bo‘lishiga yo‘l qo‘yilgani haqida suhbatlashgan.

– Umida mahallamizga kelin bo‘lib tushgan, – deydi mahalla raisi Dilfuza Amirbekova. – Lekin hozir turmush o‘rtog‘i va uch farzandi bilan boshqa joyga ko‘chib ketgan. Mahallamizda doimiy ro‘yxatda turgani uchun qaerda, qanday yashayotganini surishtirib turardim. Biroq, bu oila turli joylarda ijaraga yashab, manzilini tez-tez o‘zgartirgan. Bu yerda yashaganida u birorta nojo‘ya ish qilmagandi. Qonuniy ro‘yxatda turgan joyida yashamay, turli muhitlarga tushgani ham uning adashishiga sabab bo‘lgan.

Ko‘rinib turibdiki, ayol ro‘yxatdan o‘tmay, vaqtincha yashagan joylarida uning hayot tarzi bilan hech kim qiziqmagan. Aks holda u ishsiz bo‘lmasdi, uning qiziqishlaridan kimdir, ayniqsa, mahalla xabar topgan va uni to‘g‘ri yo‘lga solgan bo‘lardi.

Mana shunday holatlarga barham berish uchun ham Prezident har bir mahallani jinoyatchilikdan xoli hududga aylantirish, bu borada befarqlik, loqaydlik holatlariga barham berish jamiyatda tinch va osoyishta hayotni ta’minlashning asosiy shartlaridan biri ekaniga e’tibor qaratmoqda.

Ayniqsa, ayollar tomonidan jinoyat sodir etish holatlariga barham berilmayotgani tanqid qilindi. Chunki joriy yilning o‘tgan 10 oyida O‘zbekiston bo‘yicha 9,1 ming xotin-qiz jinoyatga qo‘l urgan.

Aslida ayol oiladagi muhit barqarorligida, farzandlar tarbiyasida muhim o‘rin tutadi. Ular tomonidan jinoyat sodir etilishi esa nafaqat oilalar parokandaligiga, balki bolalarning qarovsiz qolishi, xulqi buzilishi, turli nojoiz ko‘chalariga kirib ketishiga sabab bo‘lishi sir emas.

Shu sababli, davlatimiz rahbari alohida qayd etganidek, oilalardagi ijtimoiy-ma’naviy muhitni atroflicha o‘rganish, aniqlangan muammolarni joyida hal etish, bu jarayonda, ayniqsa, sektor rahbarlari, xotin-qizlar qo‘mitalari hamda jamoatchilikning mas’uliyatini oshirish muhim ahamiyatga ega, deya o‘z maqolasiga yakun yasaydi jurnalist Norgul Abduraimova.