So‘nggi kunlarda muxlislarini ketma ket tayyorlangan tuhfalar bilan xushnud etayotgan xalqimizning erka xonandasi Nilufar Usmonova ijodidagi uzoq kutilgan videoklipini namoyish qildi. Klip hozirda barchaning sevimli taronasiga aylangan “Dadasini qizi” nomli qo‘shiq uchun ishlangan. Videoasar xonandaning intiqib kutilgan qizalog‘i Sadiyaga bag‘ishlangan. Klipda qo‘shiqning yaratilish tarixi emas, balki, butunlay o‘zgacha voqea aks etgan. Undagi voqea Nilufar Usmonovaning tug‘ilgan qizalog‘i bilan bog‘liq. Xonandaning yangi ijod mahsulida juda ham sof va beg‘ubor tuyg‘ularni his qilasiz. Samimiy va mehr-muhabbatga boy mazkur video asar barchaga birdek manzur kelishiga ishonamiz. Klip mualliflariga to‘xtaladigan bo‘lsak, klip Sarvar Isaev rejissyorligida tasvirga tushirilgan. Tasvircha Rustam Murodov. Syujet janridagi klipda xonanda bilan birga uning uch o‘g‘li va qizalog‘i ishtirok etgan.