Samarqand viloyati Ichki ishlar boshqarmasi PPX va JTSB Reabilitatsiya markazining nazorat o‘tish punktida xizmat olib borayotgan xodimlar uchinchi qavat derazasiga osilib qolgan bolakayni qutqarib qoldi.

Kichik serjant E.Ibroximov oldiga 9-sinf o‘quvchisi Ziyodullayeva Parvina kelib, Gagarin ko‘chasida joylashgan ko‘p qavatli uyning 3-qavatida joylashgan xonadonlardan birining tashqi tomoni derazasida bolakay osilib qolganini aytgan. Shundan so‘ng IIB xodimlari Gagarin ko‘chasidagi 95-uyning oldiga borib, haqiqatan ham uyning 7-xonadoni, uchinchi qavati tashqi tomonidan derazaga bolakay osilib qolganini ko‘rishadi.

IIB xodimlari Sh.Narzullaev va X.Baxronovlar zudlik bilan bolakayning hayotini saqlab qolish uchun ko‘p qavatli uyda yashovchi fuqarodan adyol olib, shu yerda to‘planib turganlar bilan birga bolakay pastga tushib ketgan taqdirda uni ushlab qolish uchun xavfsizlik choralarini ko‘rishadi.

Serjant J.Ismatov, F.Umurqulov xamda safdor I.Abdusattarovlar zudlik bilan ko‘p qavatli uyning 3-qavatiga chiqishib, xonaning eshigini taqqilatishadi, ammo xonadonda hech kim yo‘q edi. Shundan so‘ng xodimlar zudlik bilan pastdan lom olib kelib, bolakayni qutqarib qolish maqsadida eshikni lom bilan buzib, xonadon ichiga kirib, derazaga osilib turgan bolani qutqarib qolishadi. Bolakay 2013 yilda tug‘ilgan, 6 yoshli G‘afurov Islombek edi. U qutqarib qolindi va onasiga soppa-sog‘ topshirildi.

Islombekning onasi 1990 yilda tug‘ilgan, X.F. bilan suhbatlashilganda u farzandini uxlatib, o‘zining shaxsiy yumushlari bilan tashqariga chiqib ketgani ma’lum bo‘ldi. Ona bilan profilaktik suhbat o‘tkazilib, kelgusida farzandini uyda qarovsiz qoldirib ketmasligi bo‘yicha ogohlantirildi.

Ushbu holatda tashabbus ko‘rsatgan fukarolar, Daminova Saodat hamda Kamilova Matlubalarga viloyat Ichki ishlar boshqarmasi o‘z minnatdorchiligini bildiradi. Achinarlisi shuki, olib borilayotgan ko‘plab profilaktik ishlarga qaramay fuqarolar orasida hanuzgacha befarqlik, loqaydlik holatlari uchramoqda.

Eslatib o‘tamiz, joriy yilning 14 yanvarida Toshkent shahrida 3 yoshli bolakay beshinchi qavat derazasidan tushib ketgan edi. Bolakayni o‘z vaqtida kerakli chora-tadbirlarni qo‘llagan qo‘shnilar qutqarib qolgandi.

Iltimos, farzandlaringizni qarovsiz qoldirmang!