Qirg‘izistonda fonogrammadan foydalanishni taqiqlab qo‘yishmoqchi
Qirg‘izistonda fonogrammadan foydalanish taqiqlab qo‘yilishi mumkin. Bu haqda 24.kg axborot agentligiga Qirg‘iziston madaniyat, axborot va turizm vaziri Altinbek Maksutov ma’lum qildi.
Maksutovning ta’kidlashicha, bu tashabbus tegishli tuzilmalar va madaniyat arboblari bilan muhokama qilinmoqda. “Biz barcha fikrlar va takliflarni yig‘moqdamiz, chunki bu ko‘pchilikka taalluqli bo‘ladi. Biroq iste’dodli kishilarni aniqlash uchun fonogrammadan foydalanishdan voz kechish kerak”, deb aytdi vazir.
Vazirning aytishicha, hozirda ko‘plab artistlar tadbirni televidenie olyapti deya ro‘kach qilib, “fanera”dan foydalanish uchun qulay bahonadan foydalanishmoqda. “Misol uchun men “Ak-Shool” bolalar ijodiy guruhining konsertida bo‘ldim. Konsertning o‘zi ajoyib bo‘ldi, biroq fonogramma yangradi, men esa bolalarning haqiqiy, jonli ovozlarini, ularning jo‘r bo‘lib qo‘shiq etishlarini tinglashni xohlagandim. Biroq ularning aytishicha, konsertni televidenie suratga olayotgani uchun shunday qilishlariga to‘g‘ri kelgan”, deb so‘zini davom ettirdi Maksutov.
Maksutovning ta’kidlashicha, bu bahona bo‘la olmaydi, chunki anchadan beri to‘g‘ridan-to‘g‘ri suratga olishda ovozni sifatli yozishga imkon beruvchi texnologiyalar mavjud. “Rossiyada anchadan beri jonli ovoz bilan suratga olishadi. Buning bizda ham imkoni bor”, deb ta’kidlamoqda vazir.
“Xitoyda artistlarga birinchi, ikkinchi, uchinchi... maqomi berilmaguncha ular asosiy sahnalarga chiqa olishmaydi. Ya’ni, u yerda juda kuchli tanlov o‘tkaziladi. Biz, albatta bundan qila olmaymiz, biroq fonogrammaga taqiqlov kim sahnaga haqiqatan ham chiqishga loyiqligini aniqlashga yordam beradi”, deb o‘z so‘zini yakunladi Maksutov.
Qirg‘izistonda fonogrammadan foydalanishni taqiqlab qo‘yishmoqchi 
