Xitoyning Xeylunszyan provinsiyasi Xarbin shahridagi shifoxonada koronavirus bilan kasallangan ayol sog'lom qiz farzandni dunyoga keltirdi.

Ism-sharifi ochiqlanmangan bemor ayol homiladorlikning 38-haftasida bo'lgan. 30 yanvar kuni esa ayolning ahvoli yomonlashgani bois shifokorlar go'dakni operatsiya yordamida dunyoga keltirishgan. Yangi tug'ilgan chaqaloqning vazni 3,05 kilogrammni tashkil etgan. Shifokorlar qizaloqning sog'lig'ini Apgar shkalasi bo'yicha o'ndan o'n, deya baholashmoqda.

Qizaloqning dunyoga kelishida ishtirok etgan shifokorlar koronavirus bo'yicha tekshiruv o'tkazishgan. 31 yanvar hamda 2 fevral kunlari qizaloqdan olingan analiz ikkala holatda ham salbiy natija ko'rsatgan.

Hozirda go'dak va uning onasi alohida xonalarda bo'lib, shifokorlar nazorati ostida. Shifokorlarning so'zlariga ko'ra, ayol asta-sekin tuzalmoqda.