Yevropa musiqiy chartlaridan xitlari o‘rin olgan o‘zbek yulduzidan eksklyuziv yangiliklar!
Bugungi kunda Shahzoda jahon andozalariga mos tarzda ijod qilayotgan yagona o‘zbek xonandasi sanaladi. U ish rejasini aniq tuzadi va unga punktual yondoshadi. Qoyil qolarlisi, oilaga ham, sayohatga ham, ijodga ham birdek ulguradi. Uning reytingi necha yillarki yuqori pog‘onada turib kelayotganining ham siri shunda bo‘lsa kerak: intilish va ulgurish!
Xonanda eksklyuziv yangiliklari bilan birinchi bizning saytimiz orqali bo‘lishdi. Shahzodaning 2015-yil yakkaxon konsertiga bora olmagan muxlislari uchun ajoyib yangilik. Shov-shuvli konsert videosi sentyabr oyida sotuvga chiqariladi.
Xabaringiz bor, Shahzodaning qo‘shiqlari Yevropa musiqiy chartlaridan ham o‘rin olgan. Bunga asosiy sabab uning xorijiy hamkasblari bilan ijodiy hamkorligidir. “Aksent” guruhi xonanda uchun yozgan ikki qo‘shig‘i “Al along” va “Mon cheri” dunyo musiqa ixlosmandlari orasida xitga aylandi. (Maldiviya poytaxti Male shahrida ham o‘zbek yulduzining “Al along” xiti jarang sochganiga shaxsan guvoh bo‘lganman!) Endi esa Yevropaning mashhur guruhi – “Aksent” va Shahzoda duet kuyladi. Tez kunda ushbu duetga shov-shuvli klip suratga olinadi!
Bundan ham shov-shuvlisi, yana bir yangi duet! Shahzoda yangi xorijiy duetdoshi va bu tarona haqida hozircha sir tutishni lozim topdi.
Bu hali hammasi emas. Tinib-tinchimas xonanda o‘zbek tilidagi yangi albomini ham yozishga kirishgan. Demak, oltin kuzga oltin xit bilan!
Shahzoda, mana shunday ijodkorana fidoyilik sizni tark etmasin! Olg‘a!
Yevropa musiqiy chartlaridan xitlari o‘rin olgan o‘zbek yulduzidan eksklyuziv yangiliklar! 
