Sochimni taraganimda taroqqa ilinib qolganidan tashqari yerga to‘kilayotganlarini ko‘rib, qo‘rqib ketayapman. Hatto qo‘lim bilan sochimni paypaslasam ham bir tutami ilinib chiqadi. Onam, asabiylikdan ham soch to‘kiladi, deyaptilar. Haqiqatan ham shunday bo‘lishi mumkinmi?
Gulbahor Qambarova, Jizzax viloyati
Ha, asabiylikdan ham soch to‘kiladi. Ammo asabiylik qaysi holatda va nima sababdan yuzaga kelayotganini aniqlashtirmay, muolaja qilib bo‘lmaydi. Avvalo o‘zingizdagi o‘zgarishlarni tahlil qilib ko‘ring. Qachondan boshlab asabiy bo‘lib qolgansiz? Nega shunday bo‘ladi? Agar biror voqea-hodisa sabab asab qo‘zg‘alishi yuz berayotgan bo‘lsa, demak tinchlanishga harakat qilishingiz kerak. Bunda sizga tinchlantiruvchi dori vositalari va damlamalar asqotadi. Bordi-yu asabiylik tashqi omillarga bog‘liq bo‘lmasa, demak organizmda biror o‘zgarish sodir bo‘layapti. Ehtimol buqoq kattalashgandir?! Maslahatim, terapevt ko‘rigidan o‘tib, so‘ngra uning ko‘rsatmasiga muvofiq boshqa mutaxassislar tekshiruvidan ham o‘tishingiz mumkin.
Soch to‘kilishi asabdanmi? 
