Kuni kecha Mirzo teatrining navbatdagi konsert dasturiga start berildi. “Har safar har xil” nomli mazkur dastur barchaga yaxshi kayfiyat ulashdi desak yanglishmaymiz.
Konsert Shukurullo Isroilov va Valijon Shamsievning chiqishi bilan boshlandi. Ularning tush haqidagi tomoshalari dastur boshidanoq barchaga yaxshi kayfiyat ulashdi. Shundan so‘ng O‘zbekistonda xizmat ko‘rsatgan artist Mirzabek Holmedovni sahnaga taklif qilishdi. Biroq avvaliga uning katta o‘g‘li Oybek Holmedov, keyingi urinishda esa kichik o‘g‘li Ulug‘bek Holmedov sahnaga tashrif buyurdi. Ularning o‘tkir hazillari tomoshabinlarga kulgu ulashdi.
Shundan so‘ng Mirzabek Holmedov tomoshabinlarga ko‘rinish berdi. Uning muxlislar bilan salomlashuvini o‘zidayoq zalda kulgu avj oldi. Tug‘ruqxona voqeasi, bolalar haqidagi hazillar, tilla baliq voqeasi, xonandalarning yoqilg‘i quyish shahobchasidagi navbat kutishi, o‘rmondagi to‘y, Ozodbek Nazarbekovni to‘yga chaqirgan otaxon voqealari barchaga manzur keldi. Miriqib kulishdi. Orada marhum xonanda Muhriddin Holiqovni xotirladi.
Shundan so‘ng, gul voqeasini aytib berdi. Bu voqea shu qadar ta’sirli ediki, muxlislar ko‘ziga yosh to‘ldi. Sahnaga biroz sokinlik cho‘kdi va Oybek Holmedov o‘zining sokin taronasini ijro etdi. Biroz o‘yga tolgan tomoshabinlar kayfiyatini uning sho‘x qo‘shig‘i ko‘tarib yubordi.
Shukurillo Isroilov va Valijon Shamsiev yana sahnada paydo bo‘lishdi. Ular Mirzabek Holmedov to‘g‘risida muxlislar bilan fikr almashishdi. Bu tomosha kutilmagan kayfiyat ulashdi. Barcha tashrif buyurganlar yuzida tabassum yugurdi. To‘satdan Mirzabek Holmedov sahnaga kirib keldi. Bu orada bo‘lib o‘tgan gap-so‘zlar ustida birgalikda tortishuvlar olib borishdi. So‘ng kichik sahna ko‘rinishiga navbat berildi.
Unda restoranda ro‘y bergan voqeani bir nechta qiziqchilar maromiga yetkazib ijro qilib berishdi. Tomosha oxiridagi Munisa Rizayevaning “ Man bop” qo‘shig‘i Ma’murjon Holmedov hamda Xalimaxonim ijrosida dasturga kutilmagan burilish yasadi. Barcha miriqib kuldi va raqsga tushdi. Bir so‘z bilan aytganda dastur o‘ta qiziqarli va kutilmagan sovg‘alarga boy bo‘ldi. Siz ham konsertga tashrif buyurib, tomosha qilib barchasiga guvohi bo‘lishingiz mumkin. Hali oldinda 4 kun bor. Imkoniyatni qo‘ldan boy bermang.
Mirzo teatrining konsert dasturidan batafsil 
