Lola Karimova-Tillyayeva: "Shukronalik hissi bilan uyg‘oning..."
Lola Karimova - Tillyayeva Instagram'dagi shaxsiy sahifasi orqali hayotidagi “oltin qoidalar”ini yozib qoldirdi.
O‘zbekistonning YuNESKOdagi doimiy vakili, “Sen yolg‘iz emassan” hayriya jamg‘armasi raisi Lola Karimova - Tillyayeva Instagram'dagi shaxsiy sahifasi orqali hayotidagi “oltin qoidalar”ini yozib qoldirdi. Lola Karimova-Tillyayeva internet foydalanuvchilari bilan muloqotga kirishar ekan, o‘zining shaxsiy mulohazalari va maslahatlari yana kimningdir hayotida as qotib qolishi mumkinligini alohida ta’kadlab o‘tdi.
“Hayotda menga yaqin bo‘lgan insonlar, dugonalarim ko‘pincha menga maslahat so‘rab murojaat qilishadi. Albatta barchamizning hayotimizda turli xil vaziyatlar sodir bo‘ladi va har bir vaziyatga alohida yondashuv talab qilinadi. Men o‘zim uchun quyidagi muhim umumiy qoidalarni belgilab olganman va ularga hamisha amal qilishga harakat qilaman. Bu maslahatlar menga hayotimda yordam beradi, demakki yana kimgadir foydali bo‘lishi mumkindir.
1. O‘z o‘tmishingizdan rozi bo‘lib, uni borligicha qabul qiling, aks holda u sizning kelajagingizni barbod etishi mumkin.
2. Shoshilmang. Vaqt deyarli barcha narsani davolaydi. Sabr-toqat bu ulug‘ fazilatdir. Sizlarda mavjud bo‘lgan ijobiy hislatlarga hayot bahsh eting va albatta ularning rohatini ko‘rasiz.
3. O‘z hayotingizni o‘zgalarniki bilan solishtirmang. Har bir insonning o‘z taqdir yo‘li bor va unda nimalar sodir bo‘layotganidan siz bexabarsiz.
4. O‘zgalar orqangizdan nimalar gapirishi bilan ishingiz bo‘lmasin. Bunga o‘z kuch-g‘ayratingiz va vaqtingizni sarflamang.
5. Baxtingiz manbai kimdadir yoki nimadadir emas, balki o‘zingizdadir. Shu onda, qalbingizdadir.
6. Shukronalik hissi bilan uyg‘oning va uyquga keting. Barcha ham sizchalik omadli emas”
Lola Karimova-Tillyayeva: "Shukronalik hissi bilan uyg‘oning..." 
