Nafaqat yoshlarning, balki, katta-kichikning qalbini zabt etgan Ummon guruhining yaqin kunlarda muxlislari e’tiboriga havola etishni niyat qilgan yangi tuhfalari haqida ma’lumot berish uchun guruh ijodkorlari bilan bog‘landik. Mart oyining birinchi haftasida Rossiya federatsiyasining uch manzilida bo‘lib o‘tadigan gastrol konsert dasturiga qizg‘in tayyorgarlik ko‘rayotgan Ummon guruhi, bir nechta yangi taronalar yaratishga ulgurishdi. Ular yaqin kunlarda so‘nggi ijod namunalaridan birini muxlislarga taqdim qilish niyatida. Qo‘shiq "O‘q tegdi" deb nomlanadi. Bundan tashqari, "Oq gulim" taronasi uchun videoklip suratga olishni ham rejalashtirishgan. Hozirda klip g‘oyasi va tayyorgarlik ishlari ustida ish olib bormoqdalar. Shuningdek, Ummon guruhi bahorni yangicha fotosessiya bilan qarshi olishi ko‘zda tutilgan.