— «Tushlar ta’biri» kitobidagi gaplarga ishonsa bo‘ladimi?

— Tarixga nazar solsak, tushlarni ta’bir qiluvchilar ko‘p bo‘lgan. Qur’oni karimda zikr qilinishicha, Hazrat Yusufga (alayhissalom) tushlar ta’birini bilish payg‘ambarlik mo‘’jizasi qilib berilgan. Tushlarni ta’bir qilish, ulardan muayyan ma’noni anglab olish mumkin.

«Tushlar ta’biri» nomidagi bir necha xil kitoblar bor. Ular orasida atoqli ulamolar oyat va hadisga muvofiq yozganlaridan foydalanish mumkin. Binoiyning 1991 va 2001 yillari nashr etilgan «Tushlar ta’biri» kitobi Ibn Sirin, Ja’far ibn Sodiq kabi ulamolar rivoyatlariga asoslangan bo‘lib, shular jumlasiga kiradi. Lekin ularni mutlaqlashtirish yoki ularga suyanib qolish to‘g‘ri emas.

«So‘ragan edingiz» kitobidan.