Toshkent davlat stomatologiya institutiga rektor tayinlandi
O‘zbekiston Respublikasi Vazirlar Mahkamasining 7-avgustdagi qarori bilan Xabilov Nigmon Luqmonovich Toshkent davlat stomatologiya instituti rektori etib tayinlandi. U shu paytga qadar Toshkent tibbiyot akademiyasi stomatologiya fakulteti dekani sifatida faoliyat yuritib kelayotgan edi. Bu haqda “Kun” xabar bermoqda.
Tibbiyot fanlari doktori, professor Nigmon Xabilov 1968-yilda tavallud topgan.
O‘zbekiston Prezidenti Islom Karimovning 2014-yil 22-iyuldagi qarori bilan Toshkent tibbiyot akademiyasi stomatologiya fakulteti negizida Toshkent davlat stomatologiya instituti tashkil etildi.
Andijon, Buxoro va Samarqand tibbiyot institutlarining stomatologiya fakultetlari, Toshkent pediatriya instituti Nukus filialining stomatologiya fakulteti negizida Toshkent davlat stomatologiya institutining respublika mintaqalaridagi filiallari tashkil etiladi.
Prezident qarori bilan institutning boshqaruv xodimlari soni cheklanib, 35 kishidan iborat tashkiliy tuzilmasi tasdiqlangan. O‘z navbatida, institut rektori zarurat tug‘ilganda, tegishli vazirliklar bilan kelishgan holda va cheklangan xodimlar soni doirasida, unga o‘zgartirishlar kiritishi mumkin.
Toshkent davlat stomatologiya institutiga rektor tayinlandi 
