Garchi Samsung kompaniyasi Galaxy S5 apparatining premium turini ishlab chiqarish to‘g‘risida tarqalgan mish-mishlarni inkor etgan bo‘lsa-da, OAVda mazkur qurilma haqidagi turli ma’lumotlarning yoritilishi davom etmoqda. Yaqinda Hindistonning Zauba portalida ishchi nomi Galaxy S5 Prime deb atalayotgan smartfon to‘g‘risida xabar berilgan, deb yozadi Mobinfo.uz.

Saytning yozishicha, shartli kodi SM-G906K bo‘lgan 4 dona qurilma Hindistonga tadqiqot o‘tkazish maqsadida jo‘natilgan. "Oddiy” Galaxy S5’dan farqli o‘laroq, Galaxy S5 Prime metall korpusga ega. Unga 5,2 dyuymli, Quad HD — 2560×1440 pikselli displey o‘rnatilgan. Smartfon chastotasi 2,5 GGs bo‘lgan 4 yadroli Qualcomm Snapdragon 805 protsessori va 3 GB operativ xotira bilan ta’minlangan. Telefonga 16 megapikselli asosiy va 2 megapikselli old kameralar o‘rnatilgan. Apparat ichiga joylashtirilgan flesh-kartaning sig‘imi 32 Gigabaytdan iborat. Qurilmada Google Android 4.4.2 KitKat mobil platformasi qo‘llanilgan.

Tarqalgan mish-mishlarga ko‘ra, Samsung Galaxy S5 Prime apparatlarining rasmiy taqdimotini may oyida o‘tkazadi.