Alcatel savdo belgisi sohibi bo‘lgan TLC kompaniyasi (Xitoy) O‘zbekiston uyali aloqa qurilmalari bozoriga kirib keldi. Joriy yilning 23-fevralidan Toshkentdagi "Fleshka” texnomarkazida (sobiq "Malika” fabrikasi) shu marka ostidagi telefonlarni sotib olish mumkin bo‘ladi. Bu haqda Mobinfo.uz sayti ma’lumot bermoqda.

Aytish kerakki, xaridorlarga Alcatel qurilmalarining keng assortimenti taklif qilinmoqda. Ular orasida sodda telefonlardan tortib ko‘p funksiyali smartfonlargacha bor. Masalan, hozirda quyidagi modellarni xarid qilish mumkin:

Alcatel OneTouch Idol X

Alcatel OneTouch Idol Ultra

Alcatel OneTouch Idol (ikkita SIM-kartali)

Alcatel OneTouch Idol Mini (ikkita SIM-kartali)

Alcatel OT-2005D (ikkita SIM-kartali)

Alcatel OT-292 (ochilib-yopiladigan)

Bozordagi savdo xodimining ma’lumot berishicha, barcha modeldagi Alcatel telefonlariga firmaning bir yillik kafolati beriladi. To‘g‘ri, hozircha O‘zbekistonda Alcatel kompaniyasining xizmat ko‘rsatish markazi tashkil etilmagan, biroq, sotuvchilarning so‘zlariga ko‘ra, bunday markaz yaqinda ochiladi.

Aniqlanishicha, Alcatel markali telefonlarning barchasi Xitoyda ishlab chiqarilgan va birortasida ham o‘zbek tili o‘rnatilmagan.

Eng arzon telefon – Alcatel OT-292 modeli 140 ming so‘mga baholangan. Markaning eng qimmat smartfoni – Alcatel OneTouch Idol X esa 986 ming so‘m turadi.

Alcatel Xitoy telefon ishlab chiqaruvchi kompaniyalari orasida O‘zbekiston bozoriga rasman kirib kelayotgan uchinchi markadir. Bungacha mazkur mamlakatning Huawei va ZTE (UZTE savdo belgisi) kompaniyalari o‘z mahsulotlarini O‘zbekistonda sotuvga chiqargan.

Eslatib o‘tamiz, 2013-yili AQSHning Las-Vegas shahrida bo‘lib o‘tgan CES-2013 maishiy elektronika ko‘rgazmasida Alcatel OneTouch Idol Ultra modeli dunyodagi eng yupqa smartfon tarzida taqdim etilgan.

Shuningdek, o‘tgan yilgi hisob-kitoblarga ko‘ra, O‘zbekistonda 19 million kishi mobil aloqa xizmatidan foydalanayotganligi va har bir oilaga o‘rtacha 3 ta uyali telefon to‘g‘ri kelayotganligi haqida ham xabar berganmiz.