Nikoh to‘yi xarajatlarini to‘lab beradigan startap paydo bo‘ldi
Nikoh to‘yi xarajatlarini to‘lab beradigan SwanLuv nomli startap loyihasi paydo bo‘ldi. Sharti esa — hech qachon ajrashmaslik. Agar nikoh to‘yi xarajatlari to‘lab berilgan juftlik qachondir ajrashishiga to‘g‘ri kelsa, startap to‘lagan mablag‘ va uning foizini qaytarishiga to‘g‘ri keladi. Bu haqda "Like It" startap va yangiliklar sayti xabar yozgan.
SwanLuv AQSh startapi bo‘lib, maqola yozilayotgan paytda, uning saytidagi ma’lumotlarga ko‘ra 62 kundan keyin ishga tushadi. U juftliklar uchun 10 000 dollargacha nikoh to‘yi xarajatlarini to‘lab beradi va toki juftlik ajrashmaguncha, evaziga hech narsa talab qilmaydi.
Startapdan foydalanish uchun uning saytida anketa qoldirish kerak bo‘ladi va loyiha maxsus tekshiruv algoritmi bilan nikohi mustahkam bo‘ladigan juftliklarni tanlaydi hamda ularning nikoh xarajatlarini qoplaydi.
Shuningdek, nikoh to‘yi xarajatlari to‘lab berilgan juftliklarning keyingi oilaviy turmushida qandaydir muammolar uchrasa, startap bepul maslahat xizmatini ham taqdim etadi.
Nikoh to‘yi xarajatlarini to‘lab beradigan startap paydo bo‘ldi 
