Тадбирда тегишли вазирлик ва идоралар, жамоат ташкилотлари вакиллари, адабиёт ва санъат намоёндалари, пойтахтимиз маҳаллалари фаоллари, ёшлар иштирок этди.

Маросимда Тошкент шаҳар ҳокими Раҳмонбек Усмонов, "Нуроний” жамғармаси Тошкент шаҳар бўлими раиси Муҳаммаджон Зуфаров, Ўзбекистон халқ шоири Маҳмуд Тоир, дзюдочи Ришод Собиров сўзга чиқди ва юртимизда олиб борилаётган қурилиш ва бунёдкорлик ишлари натижасида айниқса Тошкент шаҳри беқиёс даражада ўзгариб, янгиланиб бораётганини таъкидладилар.

Тошкентнинг марказий кўчаларидан бири  - Алишер Навоий кўчасида пойтахтимиз меъморий қиёфасини янгилаш, аҳолининг турар-жой шароитини тубдан яхшилаш дастури доирасида улкан ҳажмдаги ишлар бажарилди. Бу ерда ижтимоий-маданий ҳамда савдо ва маиший объектларни ўз ичига олган, 320 хонадонга мўлжалланган саккизта кўпқаватли янги уй барпо этилди.

Ҳар бир уй икки блок-секциядан иборат бўлиб, битта блок-секцияда 20 хонадон, битта уйда эса уч, тўрт ва беш хонали 40 хонадон жойлашган. Хонадонлар кенг, шифтлари баланд, ёруғ ва шинам, бемалол яшаш учун ҳар жиҳатдан қулай. Меҳмонхона, ётоқхона, болалар хонаси, ошхона, ювиниш хонаси халқимизнинг турмуш тарзига мос ҳажмда ва тартибда лойиҳалаштирилган. Ҳаво ҳарорати ва намлигини бир маромда сақлаш тизими шифт орасидан ўтказилган ва шу билан мазкур тизим ортиқча жой эгаллашининг олди олинган. Санузел хоналари подъезд томондаги деворга туташтириб қурилгани хоналарни подъезддаги шовқиндан ҳимоя қилади. Бундан ташқари хонадонлар "Домофон” тизими билан таъминланган, девор ва полларни пардозлаш ишларида замонавий материаллардан фойдаланилган.