Avvalroq, jahonga mashhur ispan xonanda Enrike Iglesias 28 dekabr kuni Toshkent shahrida konsert dasturini taqdim etishi haqida xabar bergan edik.

Ushbu xabardan so‘ng, tahririyatimizga konsertga chipta olish masalasi bilan bir qator qo‘ng‘iroqlar, murojaatlar bo‘ldi.

Ma’lumotlarga qaraganda, 28 dekabr kuni Toshkentdagi “Istiqlol” san’at saroyida bo‘lib o‘tishi rejalashtirilayotgan xonanda Enrike Iglesiasning konsert dasturi uchun chiptalar sotuvga chiqarilmagan.

Konsertga taklifnoma bilan kirish mumkin. Ijtimoiy tarmoqlarda esa taklifnomalar O‘zbekiston Yoshlar ittifoqi tomonidan tarqatilayotgani haqida xabarlar tarqaldi. Ittifoq rasmiylar ushbu ma’lumotlarni rad etib, konsert tashkilotchiligida ishtiroklari yo‘q ekanini ma’lum qildilar.

Xabarlarga qaraganda, konsertga taklifnomalar davlat tashkilotlari tomonidan tarqatilmoqda.

Ma’lumot o‘rnida, Enrike Iglesias O‘zbekistonga ilk bor tashrif buyurmoqda. Uning otasi, jahon yulduzi Xulio Iglesias 2008 yil Gulnora Karimova taklifi bilan Toshkentga tashrif buyurib, konsert dasturini taqdim etgandi. O‘shanda Xulio Iglesias Gulnora Karimova bilan “Besame mucho” qo‘shig‘ini duet ko‘rinishida kuylagan edi.